உங்கள் வாழ்க்கையின் இக்கட்டத்தில் நீங்கள் மகிழ்ச்சியாக இருப்பதாக உணர்ந்தால், அதற்க்குக் காரணம் உங்கள் வாழ்க்கையின் அனைத்து அம்சங்களும் சிறப்பாக இருக்கிறது என்பதால் அல்ல. நீங்கள் உன்னதமானதாகக் கருதும் ஓர் உறவு செவ்வனே சென்று கொண்டிருக்கிறது என்பதால் தான்.

உறவுகள் விதைகளைப் போல. அவை பேணி வளர்க்கப்பட வேண்டும். எதிர்பார்ப்புகள் களைகளைப் போல. அவை தானவே வளர்கின்றன. ஓர் உறவை வளர்க்க, தேவையான முதலீடுகள் செய்யப்பட்டுவிட்டால், அந்த உறவில் எதிர்பார்க்கப்படும் களைகளைக் கட்டுபடுத்தி வைத்துக் கொள்ளலாம். ஓர் உறவு அலட்சியப்படுத்தப்படும் போது, அதிலிருக்கும் எதிர்பார்ப்புகள், அந்த உறவின் வேர்களையே ஆட்டம் காணச் செய்து விடுகின்றன. வளர்ச்சியுறாது நின்றுவிட்ட உறவுகளில் எதிர்பார்ப்புகளை வளர்த்துக் கொள்வதுதான் நமது பிரச்சனை.

நாம் சேமிப்பு வங்கிக் கணக்கை இதற்க்கு உருவகமாக எடுத்துக் கொள்ளலாம். அக்கணக்கில் தொடர்ந்து பணம் போடப்படும்போது அதன் இருப்பு உயர்கிறது. நீங்கள் தேவையானபோது அதிலிருந்து எடுத்துக் கொள்ளலாம். ஆனால் அது ஒருபோதும் அதில் போடப்பட்டவற்றைவிட அதிகமாக இருக்க முடியாது. அதேபோலத்தான் உறவுகளிலும் நாம் அவ்வுறவில் போட்டுள்ள அளவிற்கே அதிலிருந்து எடுத்துக் கொள்ள முடியும்.

ஓர் உறவில் உணர்வுரீதியான இருப்பு அதிகமாக இருக்கும் போது, நாம் தவறுகள் பிறரால் பொறுத்துக் கொள்ளப்படுகின்றன. தகவல் பரிமாற்றம் போதுமானதாக இல்லாத சமயங்களில்கூடப் பொருள் புரிந்து கொள்ளப்படுகின்றது. உங்களது செயல்கள் போதுமானவையாக இல்லாத பட்சத்திலும் கூட, உங்களது நோக்கம் பாராட்டப்படுகிறது. மொத்தத்தில் அந்த உறவு நன்றாக இருக்கும். நீங்கள் நல்லவர் என்று கருதப்படுவதுதான் அதற்குக் காரணம். நீங்கள் நல்லவர் என்று கருதப்படுவதற்கான காரணம், நீங்கள் அந்த உறவில் உணர்வு இருப்புகளை வளர்க்கத் தேவையான முதலீடுகளை ஏற்கனவே இட்டு வைத்திருப்பதுதான்.

ஆனால் சில உறவுகளை நாம் பேணிக் காக்காமல் விட்டுவிடுகிறோம். அது நிலைத்து நிற்கும் என்று நாமாகவே அனுமானித்துக் கொள்கிறோம்.அதை வளர்க்க எவ்வித முயற்சிகளையும் நாம் மேற்கொள்வதில்லை. எதிர்பார்ப்புகள் வளர்ந்து கொண்டே போகும்போது, அவற்றை வளர்ப்பதற்குத் தேவையான முதலீடுகள் தொடர்ந்து இடப்படுவதில்லை. உணர்வு இருப்புகள் முழுவதும் தீர்ந்துவிடுகின்றன. அப்படிப்பட்ட ஒரு சூழலில், நீங்கள் பேசும் ஒவ்வொரு வார்த்தையும் உங்களைக் குற்றவாளியாகக் காட்டும். உங்களது ஒவ்வொரு செய்கையும் எடைபோட்டுப் பார்க்கப்படும். வார்த்தை யுத்தங்களும், ஓங்கி அறையப்படும் கதவொலிகளும் அடிகடி நிகழும். உங்களது செய்கைகள் போற்றப்படாது. உங்களது கொக்கங்கள் மதிக்கப்படாது. அத்தகைய ஓர் உறவு, கண்ணி வெடிகள் புதைக்கப்பட்டுள்ள பூமியின் மீது நடப்பது போன்றது. அவை எந்நேரமும் வெடிக்கலாம். எத்தனை முறை வேண்டுமானாலும் வெடிக்கலாம்.

இதன் தீர்வு, நினைப்பதைக் காட்டிலும் எளிது. முதலீடுகளைப் போட வேண்டும். மேலும் மேலும் முதலீடுகளைப் போட்டுக் கொண்டே இருக்க வேண்டும். நன்றாகப் போய்க் கொண்டிருக்கும் அனைத்துவிதமான உறவுகளிலும் முதலீடுகளைத் திரும்பப்பெறுதல் தவிர்க்க இயலாதது. ஆனால் போதுமான முதலீடுகளை எப்பொழுது வேண்டுமானாலும் நம்மால் அவற்றில் போட்டுக் கொள்ள முடியும். நீங்கள் உங்கள் நேரத்தை எதில் முதலீடு செய்கிறீர்களோ அது வளரும். தரமான நேரத்தை முதலீடு செய்வதன் மூலம் உறவுகள் பேணி வளர்க்கப்பட வேண்டும். அடுத்தவரைப் புரிந்து கொள்ளவும், காது கொடுத்துக் கொள்ளப்படுவதற்காக, எவ்வளவு முடியுமோ அவ்வளவு அடிக்கடிப் பேசுங்கள். கொடுக்கத் தயாராக இருங்கள். அதே சமயம், கண்ணியத்துடன் பெற்றுக் கொள்ளவும் தயாராக இருங்கள். பெறுதல் என்பது கொடுப்பவரை மதிக்கும் செயலின் வெளிப்பாடு. அதுவும் ஒரு பெரிய முதலீடுதான். முதலீட்டிற்கு மேல் முதலீடாக, ஒரு சிறந்த உறவை வளர்த்தெடுங்கள். அதன் மூலம் வாழ்வில் மகிழ்ச்சியை அறுவடை செய்யுங்கள்.

கடவுள்களுக்குக்கூட உறவுச் சிக்கல்கள் இருந்ததாகப் புராணங்கள் தெரிவிக்கின்றன. கடவுளை நெருங்க இது ஓர் அருமையான வாய்ப்பு.